Директорот на КОВЗРГ, г-дин Даријан Сотировски присуствуваше на Патријаршката и Синодална Света Литургија во Фанар.

Директорот на Комисијата за односи со верските заедници и религиозни групи (КОВЗРГ) г-дин Даријан Сотировски во рамки на својата работна посета на Р. Турција по повод доделувањето на патријаршискиот и синодален акт на Вселенската патријаршија за примање на Охридската Архиепископија во богослужбено и канонско единство со останатите православни цркви, на ден 12. 06. 2022 година присуствуваше на Патријаршката и Синодална Света Литургија во Соборниот храм „Св. Георгиј Победоносец“ во седиштето на Вселенската патријаршија во Истанбул, каде што се случи првото сослужение на поглаварот на Охридска Архиепископија, Неговото блаженство Архиепископот Охридски и Македонски и на Јустинијана Прва г. г. Стефан и Неговата Сесветост Архиепископот на Константинопол, Новиот Рим и Вселенски патријарх г. г. Вартоломеј, Патријарх на Вселенската Патријаршија.

 Со оваа заедничка богослужба, како еден од чиновите со кој се потврдува приемот на Охридска Архиепископија во литургиско единство со сите православни цркви, се потврдува и одлуката на Вселенскиот Патријарх и на Светиот патријаршиски синод на Вселенската патријаршија од 9 мај за отстранување на шизмата и за воспоставување на канонски статус на Охридска Архиепископија.

По литургијата директорот присуствуваше и на средбата на македонската државна делегација предводена од премиерот Ковачевски со Вселенскиот патријарх г. г. Вартоломеј во седиштето во Фанар.

На денешната заедничка литургија, му претходеше предавањето на Патријаршискиот и Синодален акт за прием на Охридска Архиепископија во богослужбено и канонско единство со останатите православни цркви.

Одлуката на патријархот Вартоломеј и на Вселенската патријаршија е историски настан со кој конечно се стави крај на речиси седумдесетгодишната изолација на возобновената Охридска Архиепископија.